Sesikun cukup dikenal di hulun Lampung. Sesikun biasani ditujukko juk ngeni tanggapan tingkah laku ulun sai lagi dipubalahko. Di bah sinji pepira sesikun:
- Akik Atung kutunggang api lagi kilihai.
Makna jak sesikun sinji dicawako juk hulun sai sanggup ngerjako/ngelakuko hal sai biak. Dangko hal sai lunik hal sai balak ya sanggup ngejalankoni.
- Asing helaune lohot mak lebih jak butungga.
Makna retin jak sesikun sinji tungga langsung sina lebih helau jak ngirim salam atau kah lohot. Ki ram tungga atau nyaksiko kejadian sina langsung ram dapok inpormasi sai jelas. Mak dilebihko atau dikurangi.
- Betik-betik pai pilih, nyak sapa niku sapa.
Sesikun sinji dicawako juk hulun semuarian dang buselisih ulih tian masih sanga muari. Ki wat selisih antara puari geluk sepakko cara nyin selesai dang kemunian.
- Ibarat kinjuk kajang kederaini diniku.
Reti jak sesikun sinji segala keputusan hubungan misalni muli meranai wat di salah satuni sebab ya radu pasrah gawoh. Haga dilanjutko ya siap, buragu antak dija siap munih.
- Kubedak keser jaoh kaliang cambor diwai.
Sesikun sinji dicawako juk hulun sai ngalau suatu hal kidang makin dibedak makin jaoh. Semisalni meranai sai biasa ngeharap muli sai kaya. Makin dibedak lain makin redik kidang makin jaoh harapan jadiko rasan.
- Bela wai bela batu, besi pagun kudul.
Dicawako juk hulun sai bekerja mak cerdas. Bela tenagani bela juga hartani kidang usahani mak dapokko hasil.
- Jak wai cakak jak gunung turun.
Dicawakko juk hulun sai lagi disayang Tuhan. Rezekini ratong jak dipa-dipa, api gawoh sai diusahakoni dapat ngeratongko selawat.
- Kusuk benang jukko dimuli, kusuk umung jukko diperwatin.
Artini unyin masalah serahko jama ahlini. Ki urusan sina benang sai kusuk tentuni muli lebih pandai jak perwatin, kidang ki wat perselisihan antara warga tentuni perwatin lebih ahli nyelesaikoni jak muli.
- Mak nyeseu garang lamun mak wat sai udek.
Dicawako juk hulun sai ratong ki wat hagani. Mak biasani ya ratong, sai wat keperluan yai pai silaturahim. Tentuni kak dacok di duga yaw at keperluan.
Sumber Referensi:
Pamungkas dan Muharam, Iskandar. 2015. Mahir Bahasa dan Budaya Lampung. Bandarlampung: Gunung Raja.
