CERITA RAKYAT LEGENDA DANAU RANAU (Asal Usul Danau Ghanau)
Danau ghanau pok wisata lom wilayah Lampung Barat tipik (=terletak) di pekon Lombok. Dija kak dibangun daeghah wisata tipadu ngeliputi hotel, pok penangkaghan ghusa, ghik baghih-baghih. Lamban penduduk munih dijadiko pok nginep wisatawan, tigoh tiyan dacok ngeghasako tinggal di lamban panggung.
Penduduk sekitegh danau nughtuko lamon kisah si nyeghitako asal-usul danau ghanau. Walau secagha ilmiah diyakini danau sinji tijadi skibat gempa tektonik, gegoh (=seperti) Danau Toba di Sumatera Utagha ghik Danau Maninjau di Sumatera Baghat, sebagian masyarakat sekitegh pagun percaya danau sinji buasal jak batang (=pohon) “Agha”. Konon di tengah daerah si ganta jadi danau sina tumbuh batang agha si balak temon bukeligh agheng.
Konon, masyarakat jak bubagai daerah gegoh Ogan Krui, Libah Haji, Muara Dua, Komering, bukumpul di sekeliling batang. Tiyan mansa kabar ki haga mansa wai, harus nuwagh (=menebang) batang agha sina. Masyarakat anjak bubagai daerah sina bukumpul jama ngebatok kanikan gegoh sagon, keghak mei ghik kanikan baghihni. Rasis saat haga nuwagh batang, masyarakat kebingungan cagha netokni. Ketika sinalah muncul putik di pucuk batang nyawako warga harus ngeguwai alat bubentuk cukut jelma. Tiyan ngeguwai alat ngegunako batu jama gagang kayu. Akhirni batang sina hubuh (=tumbang).
Anjak lobang bekas batang agha sina luwah wai ghik akhirni ngeluas tigoh ngebentuk danau. Sementagha batang agha si ngelintang laju ngebentuk Gunung Seminung. Ulah maghah, jin di Gunung Pesagi ngitep (=meludah) tigoh ngeguwai wai panas paghok (=dekat) Danau ghanau sedengken serpihan batu ghik tanoh akibat tumbangni batang agha ngejadi bukit di sekeliling danau.
Pagun disisi danau tepatni di pekon Suka Banjar, busebeghangan jama pekon Lombok, ngidok kubughan si diyakini masyarakat sebagai makam Si Pahit Lidah ghik Si Mata Empat. Makam keghuwani tipik di huma warga Suka Banjar geghalni Maimunah. Guna nuju mit lokasi sebaghih (=selain) cakak peghahu moto jak Lombok, dacok munih jama bukendaghaan.
Nughut jughu kunci kubughan H.Haskia dija ngidok ghuwa buwah batu balak sai (=satu) batu titelungkup diyakini sebagai makam Si Pahit Lidah ghik sai batu butegi sebagai Si Mata Empat. Si Pahit Lidah disebutken sebagai Serunting Sakti jak kerajaan Majapahit. Ulah dianggop nakal, Si Pahik Lidah si bubeghal asli Raden Sukma Jati sinji jama ghaja diusigh mit Sumatra. Akhirni ya netep di Bengkulu, Pagar Alam, ghik Lampung.
Si Pahik Lidah ngemik kelebihan yakdo setiap api si dicawakoni tikabul jadi batu. Akibatni si Mata Empat jak India nyesak ya, tigoh butungga di Lampung, tepatni di Way Mengaku. Di Way Mengaku keghuwani saling ngaku geghal. Keghuwani bughadu (=beradu) ketangguhan salah sughang si dilakuko yakdo nganik buwah bubentuk gegoh anau (=aren). Tinyata buwah anau sina pantangan bagi Si Pahik Lidah, ulah nganik ya tewas. Sementagha Si Mata Pak si ngadengi kabar lidah Si Pahik Lidah bughacun (=beracun) mak peghcaya ghik ya nyuba ngejilatni, akhir ya tewas.
Peristiwani nughut penutughan H.Haskia tijadi di pulau Pisang (1973, penyusun buku ini pernah ke pulau Pisang, keperluan melatih drumband, di PGA yang ada disana, dan penyusun menjadi Mayorette saat memperingati Hari Proklamasi Kemerdekaan RI 17-08-1973 di Pugung Tampak)….. Laju keghuwani ti tungga ko dipinggigh Danau Ghanau.
Sumber Referensi:
- Sudihartono dan Fattah, Fauzi, 2016. Bahasa dan Aksara Lampung Untuk SMA/MA/SMK kelas XI. Bandarlampung: Gunung Pesagi.
