“Topeng Lampung” kughuk di lom tradisi sai musti dipeghtahanko. Gelagh topeng Lampung wat ghua, yakdo:
1. Sekura atau Sekuraan
Sekura atau sekuraan buasal anjak masyrakat Belalau Bukit Pesagi, Sekala Beghak ghik Suku Lampung Barat.
Sekura atau sekuraan ghatong waktu haga Idul Fitri atau perayaan khusus di Kota Agung, Tanggamus.
Sekura atau sekuraan dapok dibidako jadi ghua macom yakdo:
a. Sekura Kamak
Sekura kamak berfungsi guwai ngehibur. Cighi-cighi sekura kamak:
- kawai sai dipakai anjak bebulungan diikokko dianggota badan;
- topengni kamak;
- tingkahni ngundang lalang penonton;
- sai makai topeng ghagah sai ghadu nikah.
b. Sekura Kecah/Betik/Helau
Sekura Kecah/betik/helau iyulah sekura sai kecah. Cighi-cighini:
- Kostum sai dipakai kecah-kecah ghik ghapi;
- Sai makai topengni lagi meghanai. Fungsi sekura sinji iyulah guwi ngehamikko suasana, ghik guwai ngawal sekelik jama ngusung senato (ganta cuma simbolis gawoh). Sekuraan hinji ngeghupako pentas atraksi silik (pencak silat), nyambai atau nyanyiko bait-bait pattun Lappung sai diiringi jama tetabuhan, rebana ghik pattun sai dilafalko ditujuko jama muli-muli sai nyaksiko pementasan sina. Lamonni sekura mak dibatasi.
2. Tupping (Topeng)
Tupping iyulah tradisi topeng anjak masyarakat Kuripan, Canti, Kesugihan Lampung Selatan. Topeng jenis hinji lain guwai jenis pertunjukan gawoh, kidang topeng hinji ngedok muatan spirituil sai diwarisko anjak masa Ratu Darah Putih. Lamonni topeng wat 12 buah, mak dapok lebih atau kughang,. Topeng hinji mak dapok ditawak. Tuping sai lamonni 12 iyulah tawakan anjak pudak pengawal Radin Intan II.
Selain di Canti, Marga Ratu di Kuripan juga ngedok 12 tupping, ghik ngeghupako keturunan Sebai (Ratu Ibu), sedangko di Kuripan anjak keturunan sai Bakas (Ratu Darah Putih). Di Canti, tupping sinji cuma dipakai jama meghanai beumogh 20 tahun, sai makai di lom keadaan setengah sadar.
Tupping anjak Cantik ngedok gelagh di bah hinji:
- Si Udin;
- Si Kucrok;
- Si Kuton;
- Si Atong;
- Si Kucrit;
- Si Komen;
- Si Konang;
- Si Kupir;
- Si Kucir;
- Tampur;
- Katra;
- Kabra.
Pemerintah Lampung ghadu beusaha ngenalko luwot topeng Lampung sinji jama ngadako acara “Topeng Seribu Wajah” di Festival Krakatau setiap tahunni. Hal sinji dimaksudko tagan budaya sinji tetop lestaghi ghik dapok dijadiko guwai obyek wisata di Sang Bumi Ruwa Jurai sinji.
Sumber Referensi:
- Warsiyem, S.Pd., M.Pd. dan Marlia, A.Md. Hanggum Bubahasa Lampung. Bandarlampung: Gunung Pesagi).